Rhoi gwaed yng Nghymru

Mae lefelau’r stociau gwaed yng Nghymru mewn sefyllfa sefydlog, ond mae gan Wasanaeth Gwaed Cymru dros 7,000 o apwyntiadau ar gael o hyd dros yr haf. Mae rhoddwyr sydd â grŵp gwaed teip O neu A yn cael eu hannog i roi gwaed, gan y rhagwelir y bydd stociau'n gostwng.

Yng Nghymru, nid ydym mewn sefyllfa “Rhybudd Ambr”, ac nid oes gennym unrhyw gynlluniau i gyfyngu ar y defnydd o waed mewn ysbytai, diolch i haelioni rhoddwyr ar draws Cymru sydd wedi helpu i gynnal ein cadwyn cyflenwi gwaed drwy roi gwaed.

Nod Gwasanaeth Gwaed Cymru yw cadw stoc o tua saith diwrnod o bob teip o waed. Mae'r celloedd coch mewn rhodd gwaed yn para am 35 diwrnod; gall derbyn gormod o roddion mewn cyfnod byr olygu bod y rhoddion hanfodol hyn yn dod i ben cyn iddynt gael eu defnyddio gan ysbyty. Yn yr un modd, mae peidio â chael digon o roddion yn golygu na fyddent ar gael pan fydd eu hangen ar gyfer cleifion. Dyna pam mae cyflenwad cyson o bob cynnyrch gwaed mor bwysig.

Mae apwyntiadau’n helpu i reoli’r cyflenwad a hefyd, yn helpu i ragweld lefelau stoc yn y dyfodol, gan ganiatáu i Wasanaeth Gwaed Cymru deilwra gwahoddiadau i’r grwpiau gwaed mwyaf anghenus. Ar hyn o bryd, mae rhoddwyr sydd â gwaed teip O neu A yn cael eu hannog i roi gwaed, gan y rhagwelir y bydd y grwpiau hyn yn gostwng.

Mae misoedd yr haf yn heriol am wahanol resymau, gan gynnwys y cynnydd mewn teithio, a allai ohirio rhoddwyr rhag rhoi gwaed am gyfnod o amser, y cynnydd mewn profion sgrinio aflwyddiannus oherwydd lefelau uwch o ddadhydradu a lefelau haearn is; mae digwyddiadau dros yr haf yn gostwng nifer yr apwyntiadau sydd yn cael eu gwneud hefyd, ac yn codi’r cyfraddau mewn perthynas â nifer y rhoddwyr sydd yn gwneud apwyntiadau ond sydd ddim yn mynychu.

Dywedodd Cyfarwyddwr Gwasanaeth Gwaed Cymru, Alan Prosser:

“Mae’r stociau mewn sefyllfa sefydlog yng Nghymru ar hyn o bryd, diolch i haelioni rhoddwyr ar draws y wlad. Fodd bynnag, rhagwelir y bydd stociau’n gostwng rhwng nawr a mis Medi, ac mae gennym yr her o hyd o lenwi dros 7,000 o slotiau apwyntiadau cyn diwedd cyfnod gwyliau’r haf.

“Rydyn ni’n gwybod y gall yr amser hwn fod yn anodd, gyda thripiau dramor a phobl yn gwneud y mwyaf o’r tywydd cynhesach; mae hyn yn ei gwneud hi’n anoddach i bobl ddod o hyd i’r amser i roi gwaed, ond mae’n hanfodol ein bod ni’n parhau i gynnal cyflenwad cyson o gynhyrchion gwaed i’r ysbytai.

“Rydym yn galw’n arbennig am roddwyr sydd â gwaed teip O neu A, gan fod galw mawr am y grwpiau hyn ar hyn o bryd.

“Mae gwneud y gorau o bob slot sydd gennym ni wir yn gwneud gwahaniaeth yn yr haf. Os ydych yn gwneud apwyntiad, gwnewch eich gorau i fynychu. Os nad ydych yn gallu bod yn bresennol, rhowch wybod i ni cyn gynted â phosibl, gan y byddwn yn gallu llenwi'r slot hwn gyda rhoddwr arall.

“Os nad ydych erioed wedi rhoi gwaed o’r blaen, dylech ystyried cymryd y naid honno a rhoi gwaed dros y misoedd nesaf os ydych chi dros 17 oed. Mae wir yn achub bywydau, a nawr yw’r amser perffaith i ddechrau rhoi gwaed.”

Cliciwch yma neu ffoniwch 0800 252 266 (Dydd Llun i ddydd Gwener, 8am i 8pm) i wneud apwyntiad a allai achub bywydau heddiw.