Beth sy’n diwedd ar ôl ichi rhos gwaed?

Rydych chi wedi rhoi rhodd a allai achub bywydau. Ar ran cleifion ar draws Cymru, diolch.

Nawr, beth sy'n digwydd gyda'ch rhodd?

Cyn bo hir, bydd eich rhodd yn cael ei danfon i un o'n hysbytai ar draws Cymru i'w defnyddio mewn trallwysiad sydd yn gallu achub bywydau. Mae gan eich rhodd y pŵer i achub tri bywyd. Efallai y byddwch hyd yn oed yn cael neges gennym ni yn dweud wrthych pa ysbyty sydd wedi derbyn eich rhoddion celloedd coch neu blatennau.

Gellid defnyddio eich rhodd i helpu i drin claf canser, rhywun sydd wedi dioddef anaf trawmatig, neu gallai gael ei rhoi i fam yn ystod genedigaeth.

Ar ôl i chi roi gwaed, dyma beth sy’n digwydd i'ch rhodd i sicrhau ei bod yn ddiogel, wedi'i phrosesu ac yn barod i helpu rhywun mewn angen.

Oedd gan eich rhodd dag bach coch?

Pan welwch chi rodd gyda thag bach coch, mae'n golygu y gellir rhoi'r rhoddion hyn i fabanod newydd-anedig. Os ydych chi wedi rhoi gwaed gyda ni o'r blaen a bod eich rhodd flaenorol wedi dangos i ni fod eich gwaed yn addas ar gyfer babanod, rydyn ni'n rhoi'r tag arbennig iawn hwn iddo.

Mae gan y rhoddion hyn y potensial i achub bywydau chwech o fabanod, a chael effaith eithriadol ar deuluoedd a chymunedau. Diolch i chi am fod yn arwr i'r rhai bach yma.

Dros yr ychydig wythnosau nesaf

Ychydig ddyddiau ar ôl rhoi gwaed, byddwch yn derbyn e-bost 'diolch' gennym ni, gyda rhywfaint o ystadegau a ffeithiau ar eich cyfer chi yn unig, yn dathlu nifer y rhoddion rydych chi wedi'u gwneud.

Mae pob rhodd yn gallu cael ei rhannu’n dair rhan: celloedd coch, platennau a phlasma. Os bydd eich celloedd coch yn cael eu hanfon i ysbyty, byddwch yn derbyn neges destun gennym ni, yn dweud wrthych pa ysbyty sydd wedi derbyn eich celloedd.

Dyma un o'r ffyrdd rydyn ni'n tynnu sylw at yn union pa mor bwysig yw eich rhoddion wrth drin cleifion mewn angen.

Arolwg boddhad rhoddwr

Byddwn yn anfon arolwg atoch ar ôl rhoi gwaed i gael gwybod mwy am eich profiad, o’r broses o wneud apwyntiad i roi gwaed.

Mae pob ymateb yn cael ei ddarllen, ac efallai y bydd angen i ni gysylltu â chi i gael rhagor o wybodaeth. Bydd yr wybodaeth a roddwch yn yr arolwg yn cael ei defnyddio fel adborth i'n helpu i adolygu a gwella'r Gwasanaeth.

Gallwch hefyd anfon canmoliaeth neu bryder atom ar unrhyw adeg. Darllenwch yr adran isod i gael rhagor o wybodaeth.

Digwyddiadau Niweidiol i Roddwyr

Mae'r rhan fwyaf o roddwyr yn rhoi gwaed heb unrhyw broblemau, ond weithiau, gall rhywun deimlo'n sâl neu brofi sgîl-effeithiau, ac mae hyn yn cael ei alw’n 'ddigwyddiad niweidiol i roddwyr'. Rydym wedi amlinellu beth yw'r rhain a pha mor aml maen nhw'n digwydd yma, fel bod gennych chi’r holl wybodaeth.

Er nad yw’r rhain yn digwydd yn aml iawn, mae rhai yn fwy cyffredin nag eraill.

Mae cleisio yn cael ei achosi gan waedu o dan y croen sydd weithiau'n parhau ar ôl i’r nodwydd gael ei thynnu o'r fraich. Mae’n gallu digwydd hefyd wrth fewnosod nodwydd pan fydd difrod i’r wal gyferbyn y wythïen. Mae’n gallu bod yn ganlyniad i dwll yn y rhydweli hefyd, lle mae'r nodwydd yn cael ei mewnosod yn ddamweiniol i mewn i rydweli yn lle gwythïen.

Er bod cleisiau yn gallu edrych yn ddramatig iawn ac yn gallu bad yn boenus, maen nhw fel arfer yn ddiniwed, a byddant yn diflannu. Mae’n gallu cymryd hyd at dair wythnos i gleisiau mwy ddiflannu.

Gall anghysurdeb yn y fraich fod yn ganlyniad i niwed i’r tendon neu’r nerf.

Os byddwch chi'n profi unrhyw un o'r canlynol, cysylltwch â'n tîm drwy ffonio 0800 25 22 26:

Anystwythder, gwendid neu boen yn y fraich
Poen sy'n gwaethygu gyda symudiad
Pinnau bach difrifol
Chwyddo difrifol neu lwmp yn datblygu yn y fraich
Cochni neu lid
Newid yn lliw croen y fraich neu'r llaw

Mae twll rhydwelïiol yn digwydd pan mae’r nodwydd yn cael ei mewnosod yn ddamweiniol i'r twll yn hytrach na'r wythïen. Fel arfer, mae twll rhydwelïiol yn achosi clais, ac os felly, dylech ddilyn yr un canllawiau ag yr uchod.

Os byddwch chi'n ddioddef twll yn eich rhydweli, bydd y staff yn rhoi gwybod i chi ac yn rhoi rhagor o wybodaeth i chi.

Os byddwch chi'n profi unrhyw un o'r symptomau canlynol, dylech fynd i’r Adran Damweiniau ac Achosion Brys ar unwaith, neu ffonio 999:

Mae’r gwaedu wedi ailgychwyn
Chwydd sy'n fawr neu sy’n tyfu
Dim teimlad neu binnau bach yn y fraich, law neu’r bysedd
Poen difrifol neu boen sy’n gwaethygu
Oerfel neu welwder yn y fraich isaf

Mae rhai pobl yn teimlo'n sâl, yn benysgafn neu'n llewygu cyn, yn ystod neu ar ôl rhoi gwaed. Ar achlysuron prin, gall rhoddwr lewygu.

Mae sawl peth y gallwch chi ei wneud i leihau'r risg o lewygu ar ôl eich rhodd:

Gwneud yn siŵr eich bod chi'n parhau i fwyta ac yfed digon
Osgoi ymarfer corff neu weithgaredd egnïol
Sefyll am gyfnodau hir o amser
Osgoi baddonau poeth, sawnau ac ystafelloedd stêm
Cadw’r dresin ar eich braich am o leiaf dwy awr.
Osgoi codi pethau trwm am weddill y dydd
Peidio â chymryd rhan mewn gweithgareddau peryglus ble mae angen canolbwyntio
Osgoi yfed alcohol
Osgoi ysmygu sigaréts neu anweddu am o leiaf ddwy awr

Nid yw llewygu’n golygu na allwch roi gwaed eto. Fodd bynnag, efallai y bydd ein tîm clinigol yn eich cynghori i beidio â rhoi gwaed yn y dyfodol os oes gennych hanes o lewygu ar ôl rhoi gwaed sawl gwaith.

Os byddwch chi'n mynd yn sâl yn yr wythnosau ar ôl rhoi gwaed, mae'n hanfodol eich bod chi'n rhoi gwybod i ni cyn gynted â phosibl. Nid oes angen i chi roi gwybod i ni am anhwylderau cyffredin fel peswch ac annwyd, ond efallai na fyddwn yn gallu defnyddio'ch rhodd ar gyfer trallwysiad os oes gennych chi afiechydon penodol.

Rhowch wybod i ni drwy anfon e-bost i donors@wales.nhs.uk neu drwy ein ffonio ar 0800 25 22 66.

Pryd alla i roi gwaed eto?

Rydych chi wedi rhoi gwaed, rydych chi'n teimlo'n wych, grêt – rydych chi newydd achub hyd at dri bywyd! Beth nesaf?

Gall dynion roi gwaed 12 wythnos ar ôl y tro olaf iddynt roi gwaed, ond ni allant roi gwaed mwy na bedair gwaith mewn blwyddyn.
Gall menywod roi gwaed 16 wythnos ar ôl y tro olaf iddynt roi gwaed, ond ni allant roi gwaed mwy na tair gwaith mewn blwyddyn.

Mae croeso i chi wneud apwyntiad unwaith y byddwch yn gymwys eto. Efallai y byddai'n helpu gwneud nodyn yn eich dyddiadur, neu ein ffonio ni i wirio pryd allwch chi roi gwaed eto.
Os ydych chi wedi cofrestru gyda ni i dderbyn gwahoddiadau, byddwn yn anfon neges atoch i roi gwybod i chi pryd y byddwch chi'n gymwys i roi gwaed, a phryd y bydd sesiwn arall yn eich ardal.

Pam bod angen i mi wneud apwyntiad?

Cadw'n iach rhwng rhoddion

Er eich bod chi wedi gallu rhoi gwaed unwaith, neu hyd yn oed ddwsinau o weithiau, mae'n bwysig cynnal ffordd iach o fyw er mwyn rhoi'r cyfle gorau i chi'ch hun i fedru rhoi gwaed eto.

Mae pob rhodd o waed yn cynnwys tua 240mg o haearn, sydd yn gallu cymryd hyd at chwe mis i'w ailgyflenwi. Mae'n bwysig bwyta deiet cytbwys, llawn haearn i gymryd lle'r haearn a gollwyd trwy roi gwaed. Mae haearn i'w gael mewn amrywiaeth o fwydydd, ac fel arfer, gallwch gael digon o haearn trwy fwyta deiet cytbwys.

Deiet sy'n llawn haearn

Y ffynonellau mwyaf cyfoethog o haearn yw grawnfwydydd, llysiau, cnau, wyau, pysgod a chig. Mae haearn o ffynonellau cig fel arfer yn haws i'w amsugno.

Fitamin C

Mae fitamin C h yn helpu'r corff i amsugno mwy o haearn hefyd. Felly, gall bwyta bwyd a diod sy'n cynnwys Fitamin C, fel ffrwythau, llysiau a sudd oren ffres, helpu i wella eich lefelau haearn.

Nid rhoi gwaed yw'r unig ffordd o helpu

Rhoi platennau yn Nhonysguboriau

Mae rhoi platennau yn cymryd hyd at 90 munud, mae peiriant yn gwahanu'ch platennau, yn dychwelyd y celloedd coch yn ôl i chi, ac yn eich helpu i wella'n llawer cyflymach. Gallwch gael rhagor o wybodaeth yma.

Cymorth yn y frwydr yn erbyn canser y gwaed

Os ydych chi rhwng 16 a 30 oed, neu rhwng 16 a 45 oed os ydych chi o gefndir du, Asiaidd, neu leiafrif ethnig, gallwch ymuno â'n cofrestr bân-gelloedd drwy gwblhau cais am becyn swab, sy’n cymryd dwy funud, yma.

Dewch yn gefnogwr

P'un a ydych chi'n rhoi gwaed am y tro cyntaf, yn 'gyn-filwr' neu hyd yn oed os nad yw rhoi gwaed yn rhywbeth rydych chi eisiau ei wneud, gallwch ein helpu i ledaenu'r neges am roi gwaed. Gallwch gael rhagor o wybodaeth yma.

Rhannwch eich stori

Pam bod rhoi gwaed yn bwysig i chi? Rydyn ni eisiau mwy o straeon, p'un a ydych chi'n rhoddwr, yn dderbynnydd neu hyd yn oed yn anwylyd. Mae angen straeon arnom sy'n cynrychioli ein cymunedau ar draws y wlad.

Gallai eich profiad ysbrydoli'r rhai o'ch cwmpas i wneud gwahaniaeth a'n helpu i barhau i gael cyflenwad cyson o waed yn y dyfodol.

Rhannwch eich stori

Adborth

Rydym yn ymfalchïo mewn bod yn sefydliad sy'n cael ei arwain gan adborth. Dyma sy'n ein helpu i ddarparu Gwasanaeth rydych chi'n falch o fod yn rhan ohono.

Mae pob rhodd yn adrodd stori. Mae pob rhodd yn gwneud gwahaniaeth. Os ydych chi wedi cael profiad gwych, gadewch i ni wybod.
Boed yn wyneb cyfeillgar mewn sesiwn rhoi gwaed, neu’n yrrwr, nyrs, rhywun y tu ôl i'r llenni, neges a wnaeth i chi wenu, neu os ydych chi’n syml, yn teimlo’n rhan o rywbeth arbennig, buasem yn hoffi clywed gennych chi.

Cliciwch yma i anfon canmoliaeth atom.

Ein nod yw darparu gwasanaeth o safon i bawb yr ydym yn rhyngweithio â nhw, o roddwyr, i wirfoddolwyr sydd ar ein cofrestr bôn-gelloedd, i'r ysbytai rydym yn cyflenwi gwaed iddynt a'r cleifion rydym yn eu gwasanaethu.

Os ydych chi'n teimlo bod ein Gwasanaeth wedi gostwng islaw'r safonau hynny ac yn dymuno gwneud cwyn, gallwch wneud hynny yma.

Beth sy’n diwedd ar ôl ichi rhos gwaed?